Uit outobiografiese aantekeninge wat Karel Schoeman begin maak het nadat hy met sy aftrede kom woon het op die dorp waar hy gebore is, en sporadiese dagboekaantekeninge uit dieselfde tyd, het ’n uitsonderlike geskrif ontstaan wat op beeldende en omvattende wyse gestalte gee aan sy lewe, sy werk en sy tyd, en wat volgens hom na alle waarskynlikheid sy laaste boek sal wees.
Karel Schoeman se outobiografie getuig van ’n byna verbluffende eerlikheid oor sy persoonlike lewe. Schoeman skryf oor sy ontwikkeling as mens en as skrywer, met groot openhartigheid oor sy verhouding met sy moeder (wat geskei is toe hy nog ’n kind was), wat hy alles om hom waargeneem het, sy religieuse ervaringe, sy lewensbeskouing en hoe dit alles sy skryfwerk beïnvloed het. Vir die bewonderaar en student van Schoeman se werk is hier ’n skatkis van agtergrondinligting wat egter nie met hooghartigheid aangebied word nie. Dit is waarlik die mens agter die boek maar die mens self, nie ’n buitestaander wat probeer uitlê nie. Dis ’n unieke stuk werk- Koos Human
Die boek bevat ’n swart-wit fotoseksie