RIAAN CRUYWAGEN is die langsdienende TV-nuusaanbieder in Suid-Afrika. Hy vier in 2012 sy 47ste jaar in die uitsaaiwese en sy 37ste jaar as TV-nuusaanbieder.Sy uitsaailoopbaan het in 1965 tydens sy studentedae op Stellenbosch begin totdat hy ná voltooiing van sy graadstudies in 1968 voltyds as omroeper by die Afrikaanse Diens in Johannesburg aangestel is.  Van 1971 tot 1974 het Cruywagen in Nederland gewoon, waar hy drie jaar lank as omroeper by die Afrikaanse Afdeling van Radio Nederland Wereldomroep in Hilversum gewerk het. Met sy terugkeer na Suid-Afrika in 1974 is hy aangestel en opgelei as een van die eerste TV-regisseurs by die nuwe SAUK-Televisiediens. Vanweë sy belangstelling in nuus en aktualiteit, het hy met die totstandkoming van die SAUK se TV-Nuusdiens in 1975 ‘n lid van die redaksie.Hy is in 1975 twee maande lank na die VSA en Brittanje gestuur om nuusregie te gaan bestudeer en het met sy terugkeer baie gedoen om ‘n eie styl en voorkoms vir die SAUK se TV-nuusuitsendings te help ontwikkel. As Afrikaanse joernalis, nuusredakteur en -aanbieder het hy meegewerk aan die vestiging van ‘n skryf- en visualiseringstyl vir TV-nuusberigte.As radiospeler het hy reeds in sy eerste studiejaar op universiteit aan tallose Radioteater- en Kleinteaterproduksies vir die Afrikaanse Diens begin deelneem en ook vir dié radiodiens én Springbokradio hoofrolle en ander karakterrolle in Afrikaanse vervolgverhale vertolk.  Ook in die reklamewese het hy hom spoedig vir vier dekades as 'n gesogte Afrikaanse stemkunstenaar gevestig.  Sy stem is in letterlik duisende radio-advertensies gebruik.  Hy het nooit geskroom om reklameagente beleefd op taalfoute in die Afrikaanse kopie te wys nie en het by verskeie geleenthede Engelse advertensiekopie op versoek in Afrikaans herskryf.Hy was ook jare lank die amptelike voorleser van die sitate by die jaarlikse ordetoekennings deur die Staatspresident.Cruywagen was van 1981 tot 1983 in Washington DC die SAUK se verteenwoordiger in die VSA en Kanada en by die Verenigde Nasies, en het in dié tyd daagliks nuusverslaggewing vir die SAUK se radio- en TV-dienste gedoen. Hy was ook sedert 1985 ononderbroke ‘n lid van die SAUK se Komitee vir Afrikaanse Taaladvies (KTA), waar hy die TV-nuusdiens tien jaar lank tot met die ontbinding van die KTA in 1995 verteenwoordig het. In dié tyd het hy aan sy kollegas by TV-nuus die KTA se Afrikaanse uitspraakriglyne en algemene taaladvies oorgedra.  Sedertdien – en by gebrek aan 'n KTA – raadpleeg radio- en TV-kollegas hom steeds oor Afrikaanse taalkwessies, bloot op grond van sy jare lange ervaring.  Selfs buite uitsaaiverband word sy mening oor taal- en uitspraaksake ingewin.

Publisher:

Naledi

ISBN:

9781920518226

Download Size:

10.63 MB

Copying:

Not Allowed

Printing:

Not Allowed

Not compatible with:

Kindle, Digibook, Verso, RK Book, Pocketbook 306