Die Radio Kalahari Orkes – Heuningland
Staan Opsy, De La Rey, Hier Is Staan My By
– Huisgenoot, 4 Desember
Heuninglandkoors het Suid-Afrika met ‘n groot slag getref. Vyf snitte van Heuningland, die Radio Kalahari Orkes se nuwe album, is op RSG se speellys geplaas, en ‘n groot artikel oor die unieke orkes het in Huisgenoot van 4 Desember verskyn, met nog artikels in Beeld, Rapport Weekliks en ook ‘n Kwela-verskyning op 30 Desember. Die album, ‘n ideale kersgeskenk vir oud en jonk, vlieg behoorlik van die rakke in CD-winkels landwyd.
Heuningland is ‘n hutspot van musikale style met vele talentvolle gaskunstenaars, onder andere Valiant Swart, Chris Chameleon en Jack Parow. Die orkes se klank – voortgebring vanuit akoestiese instrumente so oud soos hulle slagspreuk, bevat viole, trekklaviere, konsertinas, mandoliene, banjos, wasborde, kitare, dobro, trompette, kontrabas, kazoes en Jan Vasmaak se gepatenteerde Oos-kaapse Boozofoon. Dit is ‘n musikale styl wat jou sal wil laat opspring en dans (en so plek-plek ‘n traan laat pik).
Met 15 liedjies wat wissel van vlymskerp, tong-in-die-kies sosiale kommentaar, soms stuitig en soms mymerend melancholies, is dit die antemiese, uit-volle-bors-saamsing-treffer, “Staan My By” wat kop en skouers uitstaan as die lied wat Suid-Afrikaners regoor die wêreld se hartsnare gaan roer.
Die RKO se voorman is bekende akteur/musikant Ian Roberts en is die breinkind van skrywer Rian Malan en filmmaker Dan Roberts. Heuningland is uitgereik deur Rhythm Records en vervaardig te StoepStudios, Johannesburg.
"Dankie vir een van die verfrissendste nuwe CD's wat RSG in 'n lang periode bereik het! Die Radio Kalahari Orkes se jongste CD , Heuningland bevat 'n puik versameling van goeie wysies, lirieke en vars musikale verwerkings...'n breath of fresh air! Dankie vir Heuningland.
Tinus Esterhuizen, RSG
“Haai-i-e Mama, die zombies die kom
Met ‘n wakka doef doef en ‘n brom-brom brom”